DAVAO CITY – Gikanayon ni Mayor Sebastian “Baste” Duterte nga andam kini nga magpa-drug test apan kinahanglan aduna siya’y makauban.
Apan wala usab ginganlan sa alkalde kung kinsa ang gusto niyang makadungan sa pagpa-drug test.
Dugang pa sa mayor wala’y problema kung mupailawn siya sa maong proseso.
Kini ang tubag sa batan-ong Duterte atol sa programa nga Gikan sa Masa para sa Masa sa dihang gipangutana kini kung mosuporta ba kini kon obligahon ang mga opisyales sa gobyerno nga mupailawom sa drug test.
Kahinumduman nga niadtong Enero, giawhag ni Pang. Rodrigo Duterte si Pang. Ferdinand Marcos Jr. nga mopailawom sa drug test aron nga masuta nga dili siya usa ka drug user.
Gitawag sa kanhi Pangulong Duterte si Pang. Marcos Jr. nga usa ka drug addict atol sa Hakbang ng Maisug prayer rally nga gipahigayon dinhi sa dakbayan sa Davao niadtong Enero 28 ning kasamtangang tuig.
Una na sab nga gipaklaro sa PDEA nga wala sa drug watchlist si Pang. Marcos Jr. sukwahi sa gipamahayag sa kanhing Pangulo.
