DAVAO CITY – Human ang pag-veto ni Pangulong Ferdinand Marcos Jr. sa balaud nga nagtumong palapdan ang franchise sa Davao Light and Power Company, nanaad si Samal Mayor Al David Uy nga maningkamot gihapon kini ug magpadayon sa pagsulay alang sa kaayohan sa isla sa Samal.
Gikumpirma ni Mayor Uy nga subli niining isugyot nga hulipan ang power provider sa ilang syudad nga ning kasamtangan mao ang North Davao Electric Cooperative (Nordeco).
Gibutyag ni Uy nga mao na kini ang ikatulong higayon nga giduso sa syudad nga hulipan ang serbisyo sa NORDECO sa DLPC.
Kahinumduman nga gi-veto o gibasura sa pangulo ang maong balaud gumikan nakalapas kini sa Section 10, Article III sa 1987 Constitution, nga nanalipod o nagaprotekta sa prangkisa sa Nordeco sa Davao del Norte.
Sumala pa nga sa tuig 2028 ug 2033 pa ma-expire ang franchise sa Nordeco.
Gi-angkon ni Uy nga daghan ang nadismaya sa maong pag-veto apan dili matud pa sila muundang sa pagsulay.
Dugang pa niini nga mubalik sila sa proseso apan karon, ang Samal na lamang ang ilang hingusgan gumikan kay kung matanggal sa franchise ang Samal area, dili matud pa kaayo dako ang impact niini.
