Gikabutyag nga gikunsedera karon nga usa pinakakuyaw nga syudad sa mga langyawng turista ang kapital sa Pilipinas nga mao ang Maynila, matod pa sa Forbes Advisor.
Gibutang sa publikasyon ang Maynila nga ikalima sa pinakakuyaw nga syudad nga adunay kinatibuk-ang score nga 91.49.
Ikasiyam ang nahisgutang lugar sa Pilipinas sa krimen, ikalima sa kakuyaw sa personal nga seguridad, ikapito sa kakuyaw sa seguridad sa panglawas, ikasiyam sa kakuyaw sa seguridad sa imprastraktura ug ikadose sa kakuyaw sa digital nga seguridad.
Gawas sa Maynila, nahilakip usab ang Lagos, Nigeria sa ikaupat nga position; Yangon, Myanmar sa ikatulo nga pwesto; ug Karachi,Pakistan sa ikaduha nga pwesto sa listahan sa pinakakuyaw nga syudad sa kalibutan alang sa mga turista.
Samtang nadeskubrehan usab sa Forbes Advisor ang Caracas, Venezuela isip pinakakuyaw nga syudad sa mga turista nga matod pa adunay pinakataas nga kakuyaw sa seguridad sa panglawas, pinakataas nga kakuyaw sa krimen ug adunay pinakadautang rating sa kaluwasan sa pagbyahe, matod pa usab sa US State Department.
Samtang ang Singapore ang pinakaluwas nga nasud gumikan sa pagbaton ug pinakamaayo nga travel safety rating gikan sa US State Department ug pinakaubos nga kakuyaw sa natural nga kalamidad.
Nahilakip usab ang Tokyo, Japan sa ikaduhang pwesto; Toronto, Canada sa ikatulo nga pwesto; Sydney, Australia sa ikaupat nga pwesto ug Zurich, Switzerland sa ikalima nga pwesto sa pinakaluwas nga syudad sa tibuok kalibutan alang sa mga turista.
