Gikumperma sa Philippine Statistics Authority (PSA) nga wala sa ilahang rekord si Mary Grace Piattos, ang usa sa mga matod pa midawat ug confidential funds ubos sa aid program sa Office of the Vice President (OVP).
Gumikan niini, nabalaka ang mga magbabalaod nga migamit lamang ang OVP ug mga peke nga mga pangalan aron isulti nga nagamit pag-ayo ang pondo sa opisina, partikular na ang confidential funds.
Gipahayag ni PSA Undersecretary Claire Dennis Mapa, dili nila makita ang birth, marriage o death certificate nga adunay pangalang Mary Grace Piattos.
Apan dugang ni Mapa, mamahimong palawman pa sa ahensya ang pa-imbestiga sa rekord kung makahatag ang komite ug additional information susama sa pangalan sa ginikanan sa subject, date and place of the vital event.
Kahinumduman, nahimong kontrobersya ang pangalan ni Mary Grace Piattos homan nadeskubrehan sa mga dokumento sa Commission on Audit (COA) nga usa kini sa miperma sa acknowledgement receipt ug mukabat sa P70,000 nga kantidad sa tambal nga adunay petsang Disyembre 30, 2022.
Nagpasabot nga si Piattos ang nakadawat sa kabahin sa P125 milyon nga confidential funds nga gigasto sa OVP sulod lamang sa onse ka adlaw.
Samtang gipahayag ni Deputy Majority Leader and Tingog Rep. Jude Acidre ug Bataan Rep. Geraldine Roman nga ang rebelasyon sa PSA ang adunay serious implications sa pagpangilad.
