DAVAO CITY- Pakyas nga mapalabang sa ika-duha nga pagbasa sa konseho ning syudad sa Dabaw ang sugyot ni Councilor Al Ryan Alejandre nga Mandantory Wearing of IP Inspired Attire or Accessories.
Kini gumikan daghan sa mga kaubanan niining mga konsehal ang mi-kwestyon sa nahisgutang ordinansa sa katarungan nga mahulog nga pinugsanay kini ug mahikawan sumala pa ang mga empleyado nga magsul-ob sa buot nilang suoton.
Sumala pa ni Councilor Alejandre, mipahigayon na sila og mga committee hearing nga gitambungan sa mga representante sa unse ka mga tribal leaders sa syudad ug sa mga representante usab sa siento kwatro (104) ka mga national agencies ug uban pang mga ahensiya sa gobyerno.
Gibutyag usab ni Alejandre nga gisuportahan man usab sa mga mitambong nga representante sa mga national government ang nahisgutang sugyot.
Unod sa ordinansa ang pag-require sa tanang mga empleyado sa lokal nga kagamhanan ug sa mga national government ang pagsul-ob ug IP inspired attire sa unang adlaw nga lunes matag bulan.
Tumong niini nga ma-promote ang attire sa unse ka mga tribu sa syudad ug magbaton og kasayuran labot sa kultura sa mga lumad.
Mitambong usab sa session ang representante gikan sa Civil Service Commission aron ipasabot ang maong sugyot, apan pabiling dili kombinsido ang mga konsehal hinungdan nga nasabutan kini nga dili una ipalabang ug paminawon pa usab una sumala pa ni Alejandre ang suhestyon sa ubang mga kaubanang konsehal.
VIA|| ANGIE CHAGAS
