DAVAO CITY- Gipailalom sa Occupational Safety Training ang mga mananagat ning dakbayan sa Dabaw aron magbaton og igong kahibalo labot sa kamahinungdanon sa ilang kaluwasan samtang gihimo ang ilang panginabuhian.
Pinaagi sa pagpanguna sa Department of Labor and Employment (DOLE) ug sa pakig-alayon tali sa International Labor Organization (ILO), Occupational Safety and Health Network (OSHNet) XI, ug sa City Agriculturist’s Office, gipahigayon ang Work Improvement in Small Enterprises (WISE) for COVID Plus training seminar.
Kinatibuk-ang 124 ka mga partisipante ang gitudluan dili lamang labot sa safety practices batok COVID-19 kung dili lakip na kung pa-unsa mailhan, ma-assess ug masulbad ang uban pang mga risgo ug kakuyaw nga dala sa ilang panginabuhian.
Sa 124 ka mga partisipante, usa ka gatos ang mga mananagat gikan sa 24 ka mga barangay nga anaa nahimutang daplin sa kabaybayonan sa Davao City nga nakadawat og mga bangkang de motor ilalom sa DOLE Integrated Livelihood Program.
Sumala pa kang Aimee Evora, acting head sa CAGRO – Fisheries Resources Management Services Division, pinaagi sa training matudloan ug magiyahan ang mga mananagat sa paglikay sa mga kakuyaw atol sa ilang pagpanagat.
Dugang pa niini nga dakong tabang ang maong training aron masiguro nga sila luwas ug himsog sila ilang pagpanagat.
VIA|| Angie Chagas
