DAVAO CITY- Dakpan ang managtrato sulod sa sakyanan human nga nababagan kini sa gipahigayon nga checkpoint sa mga kasundaluhan ug kapulisan tungod sa pagsulay ug pagpalusot sa iligal nga droga ug armas dinhi sa dakbayan sa Davao.
Giila ang mga dinakpan nga sila JOSE, 51-anyos, negosyante nga residente sa Maa ug usa ka RUBY – 42anyos, nga residente sa Purok Uno, Brgy. Bambajon, Baganga, Davao Oriental.
Sa report gikan sa mga otoridad, pasado alas sais ang takna kagabii ang mga nahisgutan miagi kini sa TF Davao Sirawan Joint Checkpoint, sa Brgy. Sirawan, Toril, ning syudad nga sakay sa Toyota Vios color black nga adunay plaka nga LAC 4093, apan sa pag-abot niini sa vehicle screening area alang sa ipahigayon nga inspection, gipaubos niini ang bentana sa sakyanan apan sa gipahigayon nga palin view inspection nakita sa usa ka pulis gamit ang flashlight nga adunay dakong pakete sa gotuohang shabu nga nakita sa tuo nga side side pocket sa pantalon sa drayber.
Human niini, gipanaog sumala pa sa usa ka pulis ang nahisgutan sulod sa sakyanan ug sa dihang pagsusi niini sa sulod nakaplagan sa otoridad ang usa ka pistola nga anaa sa lingkuranan.
Samtang ang kauban niini nga babae sulod sa maong sakyanan ang gipakanaog usab apan dakong kakurat sa mga otoridad gumikan adunay laing dakong pakete sa iligal nga droga ang nakumpiska kang RUBY sa iyahang lingkuranan nga gituohang shabu nga sa kinatibuk-an gibana-banaan kini nga nagkantidad ug P432,320.
Samtang ang usa ka cal .380 Llama pistol nga adunay serial number ang gikostudiya sa mga otoridad.
Sa karon ang mga dinakpan ang anaa na sa kostudiya sa Toril PNP ug gikatakda kini nga pasakahan ug tukmang kaso.
