DAVAO CITY – Nagpagawas ug pahayag ang tigdumala sa usa ka resort sa Governor Generoso, Davao Oriental nga may kalabutan sa nag-trending nga isyu nga pagsaway sa mga nahimong bisita gumikan sa gibiyaang hugaw nga akomodasyon.
Matud pa sa management sa Jakka Beach Resort, nangayo sila ug pasaylo sa maong aksyon.
Dili nila intensyon nga pakaulawan ang mga bisita ug tumong nila nga masayod ang katawhan pinaagi sa pag-post sa maong mga litrato.
Gipahibal-an na matud pa ang mga bisita sa strikto nga pagpatuman ug mga polisiya sa resort. Kini ang unang higayon nga gibiyaan sa mga bisita ang maong kwarto nga hugaw ug gubot, ug dismayado sab sila sa maong binuhatan.
Makadawat sila ug feedback gikan sa mga guests apan dili nila tugutan ang bandalismo. Nasayod sab sila nga trabaho sa mga housekeepers nga ipabilin ang kalimpyo sa mga kwarto sa resort, apan tataw nga nagpasulabi ang mga bisita sa maong polisiya gumikan sa way pagsinabtabnay maong naghinungdan kini ug kadaot sa maong lugar.
Gipaningkamutan sa mga tigdumala nga makaistorya nila ang mga bisita apan wala sila gitagaan ug higayon ug mas gipili nilang ipasibaw kini sa social media.
Sa kinaulahian, ilang gitagaan ug bili ang privacy ug maayong serbisyo ngadto sa mga bisita sa tanang higayon ug paningkamutan nila nga bag-uhon kini alang sa musunod pang mga higayon.
Kahinumdumang nag-viral ang social media post sa resort nga dunay mga litrato sa hugawng palibot sa kwarto nga gi-book sa grupo sa usa ka vlogger. Nakahiagum ang maong post ug managlahing reaksyon gikan sa mga social media users.
via || Bombo LJ Florendo
