DAVAO CITY – Gipasidunggan ni Davao City Mayor Sebastian “Baste” Duterte ang maayong performance sa Davao City Health Office hinungdan nga nakuha sa syudad ang “Most Innovative City for Covid-19 Vaccination Rollout” ug ang “Highest Eligible Population – Fully Vaccinated for Covid-19 Vaccination Rollout”.
Gibutyag niya kini sa pinakalabing una niyang media forum isip bag-ong mayor sa syudad.
Sumala pa ni Mayor Baste nga maayo ang nahimong performance sa City Health Office sa sinugdanan pa lang ilabi na ang nahitabong polio vaccination diin nakab-ot nila ang 101% vaccination coverage niini.
Kahinumdumang nadawat nila ang mga pasidungog gikan sa National Vaccination Operations Center – Regional Vaccination Operations Center atol sa nahitabong COVID-19 Vaccination Program Planning Meeting niadtong Hunyo 28 sa usa ka dakong hotel sa Davao.
Gikanayon ni Vaccination Cluster Head Dr. Josephine Villafuerte nga pinakaunang syudad sa tibuok Rehiyon Onse ang Davao City nga naabot ang population target gikan 70% ug sa wala madugay, nakab-ot ang 80.6% nga nabakunahang populasyon sa kinatibuk-an.
Nahimong posible ang tanan tungod sa pagtinabangay sa lokal nga kagamhanan, mga pampubliko ug pribadong sektor, ug mga katawhan alang sa paspas nga rollout sa mga bakuna batok COVID-19.
Via || LJ Florendo
