Malakanyang, andam mag-imbistiga sa pahayag ni Kaufman nga padayon gihapon ang pagpatay sa administrasyong Marcos

Andam ang gobyerno nga magpahigayon og imbestigasyon sa giingong mga insidente sa pagpamatay nga adunay kalabutan sa iligal nga droga sa panahon sa pagdumala ni Pangulong Ferdinand Marcos Jr..

Sumala kang Palace Press Officer Undersecretary Claire Castro, seryoso ang pangulo nga masiguro nga dili mahimong maduguon ang iyang kampanya batok sa iligal nga droga.

Gibutyag usab niini nga kon adunay bisan unsang ebidensiya nga magpakita nga adunay nahitabong pagpamatay, andam ang gobyerno nga maglusad gilayon og imbestigasyon.

Kinumduman nga gibutyag ni Nicholas Kaufman, legal counsel ni kanhi Pangulong Rodrigo Duterte, nga kinahanglan usab imbestigahan si Marcos tungod sa giingong nagpadayon nga mga pagtay sa kampanya batok sa iligal nga droga.