Mipahigayon ug lihok-protesta pinaagi sa noise barrage sa Liwasang Bonifacio ang nagkadaiyang grupo batok sa agresibong aksyon sa China sa West Philippine Sea (WPS) sa bisperas sa makasaysayanong kalampusan sa Pilipinas sa Permanent Court of Arbitration, sa Hague, Netherlands.
Kini kabahin sa hugot nga pagsupak sa agresibong aksyon sa China ug sa padayong pag-angkon sa pipila ka bahin sa WPS kung diin gibasura ang 9-dash line walo katuig na ang nakalabay.
Dungan sa pagkalampag ug pagsaba-saba, nanawagan ang Alyansa Bantay Kapayapaan ug Demokrasya kang Pangulong Ferdinand ‘Bongbong’ Marcos Jr, nga himuong West Philippine Sea awareness month ang bulan sa Hulyo sa tibuok nasud isip paghatag ug importansya ug paghinumdum sa makasay-sayanong kalampusan sa Pilipinas batok sa China.
Sa nahisgutang kalihukan, gipermahan usab sa grupo ang usa ka Joint Resolution series of 2024 nga nagpadayag ug tibuok suporta sa nagkadaiyang lider gikan sa nagkadaiyang sectoral ug People’s organization sa pagpagawas sa Executive Order nga mideklara nga ang bulan sa Hulyo ang usa ka West Philippine Sea (WPS) awareness month.
Nagpalupad usab ang mga nahisgutan ug mga kalapati isip simbolo sa kalinaw sa giilugang teritoryo.
