DAVAO CITY – Naglusad na ang Bansalan PNP og hot pursuit operation batok sa tulisan kinsa nanulis patay sa magtiayong Senior Citizen kinsa ang asawa gidudahang gilugos sa suspek.
Subay sa report sa kapulisan, pasado alas 4 sa hapon dihang patay na nga nakaplagan sa usa ka alyas “Blas” ang biktima nga giilang sila Evelinda Galigao Gumapac, 60-anyos minyo ug Modesto Balili Gumapac, 66-anyos, residente sa Purok Durian, Brgy. Kinuskusan, Bansalan, Davao del Sur.
Gilayong nakapangayo og tabang si alyas “Blas” ngadto sa kapulisan. Subay sa imbestigasyon, sa gawas sa panimalay na nakaplagan ang babaeng biktima, kinsa naligo kini sa kaugalingong dugo, nagkulob sa yuta ug hubo ang biste sa ubos nga parte sa iyang lawas.
Nadiskubrehan usab nga nagkatag ang gamit sa mga biktima sulod sa panimalay niini ug gituohang pagpangawat ang unang motibo sa krimen sanglit bag-ohay lang matod pa nagbaligya og kopras ang mga nahisgutan.
Sa karon, gipahiluna na sa Brillantes Funeral Homes sa R Delos Cientos ST., Poblacion Uno, Bansalan, Davao del Sur ang patay’ng lawas sa mga biktima, samtang nagpadayon karon ang lawom nga imbestigasyon sa Bansalan MPS labot sa maong hitabo.
