Nagbangutan karon ang pamilya sa manag-uyab human nga nakabsan sa kinabuhi gumikan sa nahitabong disgrasya sa Malalag Davao Del Sur. Subay sa report sa kapulisan, giila ang mga biktima nga sila Venus Suico nga backride sa iyahang uyab nga si Jay Em Calibay. Sa gihimong imbistigasyon sa kapulisan, nahitabo ang disgrasya pasado alas Dyes Dominggo sa buntag sa Digos-Sarangani Coastal Road, Barangay Bagumbayan, Malalag.
Sumala pa sa Malalag Police Station nga gikan sa Kidapawan City, North Cotabato ang mga biktima kauban ang laing 12 pa ka mga riders ug paingon sumala pa unta kini sa Elymar’s Beach Resort sa Basiawan, Sta. Maria, Davao Occidental apan pag-abot sa nahitabuan mi-overtake sumala pa ang biktima nga si Calibay sa iyahang kaubang rider nga miresulta sa pagkasangit sa Bus tungod nawad-an og kontrol biktima gumikan kurbada ang maong dalan.
Tungod sa maong panghitabo, nalabay ang mga biktima og nabunal sa semento nga karsada, samtang ang babaeng biktima ang napasok sa ilawom sa Bus nga maoy hinungdan sa iyahang hinanaling kamatayon. Samtang si Calibay ang gidala pa sa ospital apan gideklara kining dead on arrival.
