DAVAO DEL SUR- Patay ng miabot sa ospital ang usa ka mag-uuma human nga gitigbas sa iyahang kauban sa paghantak sa Purok Nakasaka, Poblacion Dos, Bansalan, Davao del Sur pasado alas singko sa hapon.
Subay sa report sa kapulisan, giila ang biktima nga si Gorgonio Alforo Burlaza, 63 anyos biyudo, samtang ang suspek naila nga si Victoriano Ruteres Palermo alyas VICTOR COBRA 62 anyos, minyo, faith healer, nga susamang residente sa Purok Nakasaka, Poblacion Dos, Bansalan, Davao del Sur.
Subay saa gilusad nga imbistigasyon sa kapulisan, naghantak sumala pa ang mga nahisgutan sa daplin sa dalan atubangan sa balay sa biktima samtang nag-inom usab kini sulod sa balay kauban lain pang usa.
Sa ilaha sumala pa nga panag-inom nagkalis ang mga nahisgutan sa wala masayri nga hinungdan nga miresulta sa kagubot niadtong tungura.
Sumala pa, miuli ang suspek sa ilahang balay dayon mibalik kini dala ang sundang nga maoy gigamit sa pagtigbas ngadto sa biktima nga miresulta sa kamatayon human nga nakaangkon kini ug daghang samad tinigbasan.
Dugang usab sa imbistigasyon, nadamay pa ang binuhing manok ug iro ug ang pedicab nga gitigbas usab sa suspetsado nga nagromentado niadtong tungura.
Human sa maong panghitabo gilayon nga misibat kini palayo sa lugar apan nadakpan gilayon kini sa gihimong manhunt operation sa kapulisan.
Sa crime scene narekober ang sundang nga gibilin sa suspek nga adunay gitas-on nga duha ka tiil ug duha ka pulgada nga anaa na karon sa kostudiya sa kapulisan ingon man ang suspek.
Samtang giandam na ang kaso nga ipasaka batok sa nahisgutang suspetsado.
