DAVAO REGION- Patay ang usa ka mag-uuma human nga gipusil patay sa duha ka mga suspek kagahapon sa buntag sa munisipalidad sa Manay, Davao Oriental.
Subay sa report sa kapulisan, usa ka tawag ang ilahang nadawat pasado ala-una ang takna sa hapon gikan kang Brgy. Kagawad Lemuel Langdanganon sa Brgy Taocanga, Manay Davao Oriental kabahin sa usa ka shooting incident nga miresulta sa kamatayon sa biktima.
Gilayon nga girespondehan sa mga otoridad ang maong sumbong ug nagpahigayon ug imbistigasyon sa nahitabo-an uban ang RPSB aron sa pagberepika sa nasampit nga lugar.
Sa inisyal nga imbistigasyon sa kapulisan, pasado alas sais ang takna sa buntag, ang wala panganli sa kapulisan nga biktima kauban ang iyahang anak nga lalaki ang nagbaktas padulong sa ilahang kamaisan nga adunay usa ka kilometro ang gilay-on, apan sa wala sila nakaabot sa ilahang uma, kalit kining gibanhigan sa mga suspetsado nga sumala pa sa kabanay sa biktima nga mao sila alias Toto ug Setol ug gipusil ang biktima gamit ang homemade shotgun kon ” Bukakang”.
Human sa maong panghitabo, dali nga misibat ang mga suspetsado palayo sa lugar. Sumala pa sa kapulisan nga nakaangkon ang biktima ug walo ka mga samad pinusilan sa iyahang kalawasan nga maoy hinungdan sa hinanaling kamatayon sa biktima.
Sumla pa sa anak nga nakauban sa biktima nga naglakaw ang iyahang amahan niadtong tungura nga gibana-banaan nga lima ka metros ang gilay-on nga nag-una kaniya diin ang mga suspek ang nitago sa daplin ug pglabay niini dali kining gipusil sa likod nga bahin ug ubang bahin sa kalawasan.
Saysay usab sa kapuyo sa mag-uuma nga ang mga suspek giakusahan ang biktima nga maoy nagbarang sa ilahang igsuon.
Samtang gikanayon sa mga otoridad nga nagdumili na ang kabanay nga ipailawom sa otopsiya ang patay nga lawas sa biktima.
Sa pagkakaron nagpadayon ang hot pusuit operation sa mga suspetsado human nga misibat atol sa maong panghitabo.
