DAVAO CITY – Gipatuman gilayon sugod kagahapong adlawa sa lungsod sa Santo Tomas sa Davao del Norte ang suspensiyon sa klase sa tanan nga level sa ilang mga tulonghaan.
Kini dungan usab sa deklarasyon nga state of public health emergency tungod sa coronavirus disease (COVID-19) outbreak.
Mismong si Mayor Ernesto Evangelista ang nagpagula sa maong kamandoan epekto kagahapon, Marso 11 isip precautionary measures sa lalawigan.
Gawas niini, nagpatuman na sab ang lalawigan ug mga hugtanon nga sumbanan aron nga malikayan ug malimitahan ang pagkatag sa virus dungan sa pag-isyu ug GUIDELINES NO. 1 sa tanan nga mga Tomasiños diin kinahanglan kini nga tumanon luyo sa bahad sa COVID-19.
Mi-apela sab ang opisyal ngadto sa tanan nga mga ginikanan nga dili tugtan ang ilang mga anak nga magsuroy-suroy sa mga pampublikong lugar ilabi na kung dili kini mahinungdanon.
Angayan sab sumala pa nga mouli gilayon ang mga estudyante nga anaa sa mga pampublikong lugar ilabi na kung walay ginikanan nga mogiya niini.
Samtang karong adlawa, gikatakda usab nga ipagula ang gi-isyu nga Executive Order kalabot niini.
