Gipaklaro sa Land Transportation Office (LTO) Region 11 nga ang mga miluwat nga balita bahin sa pagpatuman og number coding scheme sa kadalanan usa lamang ka suhestiyon, ug ang buhatan wala nagpatuman niini.
Gipasabot ni Atty. Ernesto Raphael Robillo, LTO-Davao Regional Director, nga ang number coding scheme gisugyot lamang nga usa ka ideya sa maong diskusyon ug gikonsidera kini ni Assistant Secretary, Atty. Vigor D. Mendoza II, isip usa sa mga potensyal nga solusyon sa ‘traffic management’.
Apan, usa lamang kini sumala pa ka pahayag ug dili angay nga sabton nga pinal nga laraw o polisiya nga ipatuman sa rehiyon ilabi na dinhi sa Davao City.
Gipaklaro usab sa LTO nga ang mga desisyon sa traffic management, sakop sa lokal nga kagamhanan sa siyudad, ug diin ang papel sa buhatan limitado lamang sa pagpatuman sa balaod.
Giawhag sa LTO ang publiko nga magsalig lamang sa mga opisyal nga tinubdan alang sa tinuod nga impormasyon ug likayan ang pagpakaylap sa mga mali nga impormasyon.
