DAVAO CITY – Wala sumala pay nadakpan ang Land Transportation Office (LTO) nga nakasupak sa Anti-Distracted Driving Act (Adda) sa Davao Region kini tungod kinahanglan una nila nga tutukan ang information dissemination campaign alang sa bag-ong balaud.
Matud pa kang Benjamin Antonio, ang hepe sa law enforcement unit sa LTO-Davao, ang Adda gipatuman kagahapong adlawa ayha gipagula ang gi-amyendahan nga implementing rules and regulations (IRR) sa balaud. Gitino sa opisyal nga dili una sila manakop ug mga Adda violators sa rehiyon gumikan kay ila pang giproseso ang information drive aron nga ma-edukar ang publiko sa probisyon sa balaud.
Matud pa kang Atty. Gomer Dy ang regional director sa LTO XI, makigkita una sila sa mga hingtungdan nga ahensiya sa kagamhanan nga kalakip sa mga magpatuman sa balaud ug sugdan una nila kini pinaagi sa pagpahimangno sa mga motorista ayha hingpit ang pagpahamtang ug mga multa.
Gipasabot sab ni Atty. Gomer Dy nga kinahanglan naka-concentrate ang mga driver sa ilang pagmaneho hinungdan nga gawas sa ilang mga mata nga magtan-aw lamang sa kadalanan, gidili sab ang pagbutang ug headset aron maminaw ug sa music.
Pahayag ni Atty. Gomer Dy ang regional director sa LTO XI. Kahinumduman nga ilalom sa revised IRR sa Adda, gidili ang paggamit ug bisan unsa man nga mobile communication devices ug electronic entertainment gadgets aron magsulat, mag-send o pagbasa sa text ingon man pagtawag o motubag sa tawag, pagdula, pagtan-aw ug pelikula ug mag-surf sa internet samtang nagmaheno sa sakyanan samtang naka-red light o anaa sa intersection.
Ang mga makalapas sa balaud mamahimong pamultahon ug P5,000 alang sa offense, P10,000 sa second offense ug P15,000 ingon man tulo ka bulan nga suspension sa driver’s license alang sa third offense.
Samtang kung pipila ka higayon na ang nakahimo ug kalapasan, mamahimong ipatuman ang revocation sa driver’s license ug pamultahon ug P20,000.
