DAVAO CITY – Naglaum ang Land Transportation Franchising Regulatory Board (LTFRB) XI nga malugwayan pa ang fuel subsidy ilalom sa Pantawid Pasada Program (PPP), human nga hingpit nang natapus ang deadline niini kagahapong adlawa.
Gikanayon ni Ivy Dalay Gambuta, Admin officer 1 sa LTFRBB 11 nga moabot lamang sa 1,690 ka mga drivers ang mi-claim sa ilang PPP cards, gikan sa total beneficiaries sa programa nga 2,617.
Kahinumduman nga una nang gitakda niadtong Pebrebro 25, 2022 ang deadline sa fuel subsidy, apan tungod kay daghan lamang gihapon sa mga PhilCab operators ang walam pa maka-claim gilugwayan na usab kini ug hangtud kagahapong adlawa.
Dugang pa ni Gambuta nga usa sa mga hinungdan nganong daghan sa mga drivers ug operators ang wala pa naka-claim sa ilang PPP cards gumikan kay dili sila ang orihinal nga nanag-iya sa sakyanan diin nagkinahanglan pa sila ug SPA gikan sa ilang gipalitan niini.
Samtang, na-release na usab sumala pa sa LTFRB 11 pinaagi sa land bank ang tanang 3,948 PPP cards alang sa mga PUJ drivers ug operators sa kantiodad nga P7,200 matag usa.
Plano usab sumala pa nga himuong benepisyaryo sa nahisguutang programa ang mga public utility bus, taxi, UV express, tricycle ug uban pang public transport services.
