DAVAO CITY- Gipasabot sa Land Transportation and Franchising Regulatory Board kun LTFRB XI nga ang pagsaka sa presyo sa petrolyo ang usa sa mga hinungdan kung nganong gipatuman nila ang pagpa-usbaw usab sa pletihan sugod karong adlawa, adlaw nga Lunes, petsa tres ning bulan sa Oktobre.
Dugang gipahayag ni LTFRB Davao Region legal officer Atty. Ernest Benz Davila, sa pagpagawas nila sa nahisgutang desisyon, ginahuna-huna sa board ang kasamtangang kahimtang sa ekonomiya nga naapektohan gumikan sa nagkadaiyang proseso ma-lokal ug international man nga natad.
Samtang ang uban pang rason sa pagpa-usbaw sa pletihan mao ang pagsaka sa gigasto sa mga operator sa public utility vehicles.
Gikanayon pa sa opisyal nga ang pagpasaka sa pletihan sa rehiyon ang gibase usab sa mga pagtuon nga gihimo sa National Economic Development Authority ug LTFRB lakip na sa mga nagasakay kun commuters.
Misaka na sa dose pesos ang pletihan sugod karong adlawa gikan sa kanhi onse pesos nga minimum nga pletihan.
VIA|| RICO SALVA
