Nahimo nang tropical depression ang low pressure area (LPA) nga gibantayan sa gawas sa Philippine Area of Responsibility (PAR).
Sumala sa ahensya, bisan og wala pa kini nakasulod sa PAR, padayon gihapon nga gimonitor ang lihok niini tungod kay posible kini makaapekto sa kahimtang sa panahon sa mga musunod nga adlaw.
Subay sa datos sa weather bureau, ang tropical depression adunay kusog sa hangin nga moabot ngadto sa 45 kilometro kada oras duol sa sentro, ug adunay paghaguros nga moabot og 60 kilometro kada oras.
Gilauman nga molihok kini pa-kasadpan amihanang-kasadpan ug posible nga mosulod sa PAR sulod sa usa hangtod duha ka adlaw.
Kung makasulod na kini sa PAR panganlan na kini subay sa listahan sa mga bagyo karong tuiga.
Gipahimangnoan sa mga eksperto ang publiko nga magpabiling nakatutok sa opisyal nga pagpahibalo ug dili gilayon pagtuo sa dili beripikadong impormasyon.
Dugang pa sa ahensya, ang pagkamugna sa tropical depression sa gawas sa PAR usa ka timailhan sa mas sayo nga aktibidad sa bagyo karong tuiga, nga kasagarang gilauman sa tunga-tunga nga bahin sa tuig ilabi na sa bulan sa Hunyo.
