DAVAO CITY – Nakabsan sa kinabuhi ang usa ka lola kauban ang duha ka apo niini gumikan sa miulbong kalayo nga milamoy sa usa ka balay ug tulo ka commercial buildings sa Purok 3, Brgy. Poblacion, Davao de Oro ala una ang takna sa kaadlawon kagahapon.
Giila ang mga biktima nga sila Mariarita Mag-aso, 73 anyos; Mark Prince Ladroma, 9 anyos ug si Willy Boy Mag-aso, Grade 8 student.
Subay sa taho sa otoridad, lakip sa mga nasunog ang panimalay sa usa ka Judith Retamas, tulo ka mga commercial buildings nga gilakipan sa lumber nga gipanag-iyahan ni Herbert Asenio, paint seller nga gipanag-iyahan ni Adelo Gallego ug tailoring nga panag-iya ni Rodel Ladroma – amahan sa namatay nga 9 anyos nga bata.
Gibutyag ni Ladroma nga ang iyang sastre nga si Dodong ang bugtong nakalingkawas sa pag-ulbo sa maong dakong kalayo. Nasayran nga natulog si Dodong kauban ang tulo ka mga biktima sulod sa Tailoring. Dali matud pa nga gipukaw kini sa tigulang human nga namatikdan niini ang sunog hinungdan nga dali gilayon nga nakadagan gawas sa maong gambalay si Dodong apan ang mismong tigulang og ang duha ka apo niini natanggong ug nabilin sulod sa nasunog nga gambalay.
Subay sa maong panghitabo, dali gilayong miresponde ang Compostela Fire Station sa nahitaboan sa maong insidente ug napugngan ang pagkaylap sa maong kalayo. Human sa usa ka oras, gideklara na kini nga fireout sa mga otoridad.
Padayun pang ginasuta karon kung unsa ang hinungdan ug asa nagsugod ang maong sunog nga miresulta sa pagkamatay sa tulo ka tao.
