Nalangan ug pipila ka oras ang pagbyahe sa eroplano sa Philippine Airlines (PAL) nga adunay pasahero nga 71 ka mga kongresista nga mubalik na sa Manila, homan nagbino-ang ang usa ka tigulang nga babaye nga naka-wheelchair nga adunay sulod kuno nga bomba ang bagahe niini sa Tacloban City airport.
Matod pa ang PAL flight PR 2988 ang gikatakda na untang mag-take off sa Daniel Romualdez Airport sa Tacloban City alas-6:30 sa gabii apan nag-bomb joke ang babaeng senior citizen sa flight attendant nga maong bug-at kuno ang bagahe niini gumikan kay bomba ang sulod.
Ang nahisgutang senior citizen ang kasamtangang anaa sa sulod sa eroplano isip prayoridad nga pasahero nga unang makasakay ug samtang gitabangan kini sa flight attendant, nag-bomb joke na hinuon ang tigulang.
Ubos sa Presidential Decree No. 1727 (Bomb Joke/Threat Law) gikunsedera kini nga seryosong hulga sa mga security ug law enforcement operatives kung diin nag-atubang sa pag-aresto ug pagkakulong hangtod sa lima katuig ang bisan si kinsang mosupak sa nahisgutang balaod.
Lakip sa mga pasahero sa eroplano sila si Manila 6th District Bienvenido Abante Jr., Bataan 3rd District Rep. Geraldine Roman, Marikina 2nd District Rep. Stella Quimbo, OFW Partylist Rep. Marissa del Mar Magsino ug uban pa lakip na ang pipila ka reporters sa kongreso nga mihimo ug coverage sa anibersaryo sa Bagong Pilipinas Serbisyo Fair (BPSF) caravan sa administrasyong Marcos jr. kung diin anaa sa P1.26 bilyong kantidad sa serbisyo ug ayuda ang gihatag sa mga residente sa Eastern Visayas.
Gumikan niini, isip kabahin sa standard operating procedure, gisuspende una ang proseso sa boarding ug gi-aresto ang tigulang nga yaga yaga-on nga na-offload sa eroplano ug gidala sa buhatan sa PNP Aviation and Security Group (ASG) sa nahisgutang airport ug gipailalom sa imbestigasyon.
Gipakanaug ang mga pasahero ug gidala sa holding room samtang gi-inspeksyon sa mga awtoridad ang eroplano. Samtang ang tanang bagahe sa eroplano ang gipakanaug usab ug pipila ka K9 team kauban ang mga bomb sniffing dogs ang subling gi-inspekyon ang mga bagahe sa mga pasahero sa eroplano nga na-stranded sa boarding gate.
Walay nakaplagang bomba sa eroplano nga adunay 200 ka mga pasahero.
Homan maseguro nga walay sa bomba sa eroplano, gipasakay pagbalik ang mga pasahero gawas tigulang-babaye nga nag-bomb joke.
