DAVAO CITY – Gikagul-an sa grupo sa mga magsisisbya sa Pilipinas ang matud pa hinay nga paglihok sa gobyerno sa mga kaso sa pagpamanhig sa mga magsisibya sama na lamang sa nahitabo kang Juan Tumpag Jumalon alyas Johny Walker kansang gipusil patay sa mga armado samtang nag-programa niadtong Nobyembre 5 sa Calamba, Misamis Occidental.
Sumala kang Kate Cortez, ang National Vice Chairperson sa National Union of Journalists of the Philippines, nga eklusibong nakahinabi sa Bombo Radyo Davao, bisan pa man adunay mga balaod nga nagpanalipod sa mga myembro sa midya, nagasaka gihapon ang mga kaso sa media attacks karong panahuna.
Sumala pa sa talaan sa grupo, si Jumalon ang ika-199 ka brodkaster nga napatay dinhi sa nasud ug ika-4 ning kasamtangang administrasyon ni Pangulong Marcos, Jr., diin sagad niini ang wala pa naresolba.
Ubos sa administrasyon ni PBBM, napatay sila Rey Blanco, Percival “Percy Lapid” Mabasa, Cresenciano Bundoquin, ug ang bag-uhay lamang nga si Jumalon.
Dugang pa niana ang 101 ka mga kaso sa tanang klase sa media attacks sama sa red-tagging, pagpanabotahe, ug pagbugal-bugal sa mga myembro sa midya sa kasamtangang administrasyon.
Naalarma sab ang opisyal sa nagkadaghang kaso nga nagpahinabo latas sa mga katuigan ug sa managlahing administrasyon sa Pilipinas.
Ilabi na diha ang langay nga paglihok niini aron maangkon ang hustisya sa mga biktima.
Pipila na ka mga kaso sa impunity sa nasud ang pagpamanhig sa pipila ka mga myembro sa midya sama nila environmentalist Gerry Ortega ug 32 ka mga sakop sa midya sa duguong Maguindanao Massacre nga gikatakdang hinumdumon karong Nobyembre 23.
Sumala sa 2023 Global Impunity Index sa Committee to Protect Journalists kon CPJ, nahimutang ang Pilipinas sa ikawalo kon eighth worst country sa pagpasilot sa mga tigpatay sa mga tigbalita.
Sa susamang pakighinabi sa Bombo Radyo Davao ngadto kang Cortez, gikalipay sa opisyal sa grupo ang aksyon sa gobyerno sa pagpanubay sa pagpamanhig kang Jumalon, sama na lamang sa paspas nga pagpamugna sa SITG Jumalon nga gilangkuban sa PNP, NBI ug Presidential Anti-Organized Crime Commission kon PAOCC.
Dugang pa ni Cortez, dagko ang pagsalig sa grupo nga mamahimong paspas ang dagan sa nagpadayong imbestigasyon.
Nanawagan sab ang opisyal ngadto sa gobyerno nga mahatagan og bangkil ang mga balaod nga nagprotekta sa katungod sa mga sakop sa midya.
Sumala pa sa opisyal, kon ugaling hikawan ang kagawasan sa midya nga manubay ug magsibya sa kamatuoran, mabutang sa alanganin ang katungod sa katawhan sa pag-angkon og mahinungdanon impormasyon.
Nanawagan sab kini ngadto sa ubang mga media outlet nga ipatigbabaw ang katungod sa katawhan sa kamatuoran taliwala sa kumpetisyon, ug alang sa katawhan nga konsiderahon ang proteksyon sa mga myembro sa midya aron mupatigbabaw ang kagawasan sa kasayuran.
via || Bombo LJF
