DAVAO CITY – Nakighiusa ang mga lokal nga kagamhanan sa Davao City ug probinsya sa Davao del Norte sa pagmugna og executive committee alang sa umaabot nga Ironman 70.3 triathlon event.
Gikanayon ni Davao City Sports Development Office Head Mikey Aportadera nga andam na ang dakbayan ug mga kasikbit nga lugar sa norte alang sa maong kalihukan ug kasamtangan pang ginahan-ay ang lain pang mga detalye sa musunod pang mga simana.
Gipunting sab niini ang importansya sa duol nga pakig-alayon sa mga LGUs alang sa husay nga dagan sa pinakaginaatngang sports event sa nasud.
Gipanaad sab ni Davao del Norte Provincial Sports and Youth Development Office Head Giovanni Gulanes nga magpabilin ang probinsya sa joint effort sa pag-host sa maong kalihukan, ug pipila ka mga sayup sab ang naminosan gumikan sa mga hagit nga giatubang sa naunang duha ka higayon nga pagpahigayon sa maong sports event.
Ginapaniguro sab sa mga panggamhanan sa Panabo City, Carmen, ug Tagum City ang kaluwasan sa mga partisipante ug manan-away atol sa karera.
Naghangyo sab si Davao del Norte Governor Edwin Jubahib og kahiusahan sa mga lumulupyo sa probinsya ilabi na sa pagsunod sa health and safety protocols batok COVID.
Kapin 1,400 ka mga partisipante gikan sa 44 ka mga nasud ang gilaumang musalmot sa Ironman 70.3 triathlon nga ipahigayon karong Marso 26, ning tuiga.
Lakip sa kapin 70 kilometros na ruta nga agian sa mga partisipante ang mga kadalanan sa Davao City, Panabo City, lungsod sa Carmen, ug Tagum City.
via || Bombo LJF
