DAVAO CITY – Nakiglambigit na karon ang lokal nga kagamhanan ngadto sa mga balay tambalanan sa dakbayan alang sa posibilidad nga tangtangon na ang mandatory RT-PCR Covid-19 test sa higayon nga adunay mga pasyente nga magpa-ospital.
Una ng gibutyag ni Davao City Mayor Inday Sara Duterte-Carpio nga aduna nay hisgutanan kalabot niini ang lokal nga kagamhanan, private hospitals, Southern Philippines Medical Center (SPMC), Food and Drug Administration (FDA), ug Philippine Health Insurance (PhilHealth).
Magmugna matud pa ang siyudad ug executive order nga magmando sa mga balay tambalanan nga tugtan nga maadmit ang pasyente bisan nga dili kini mopailalom sa real-time reverse transcription polymerase chain reaction (RT-PCR) test.
Apan wala sumala pay proposal o initial draft sa executive order.
Hisgutan na sab ang maong lakang sa health sector sumala pa kang Davao City Covid-19 Task Force spokesperson Dr. Michelle Schlosser arun nga mahatagan sab kini ug katin-awan.
