DAVAO CITY – Lauman nga muhimo ug tukma nga aksiyon ang lokal nga kagamhanan batok sa mga indibidwal kansa mipaluyo sa pagpahimutang ug billboard nga nag-awhag sa mga ginikanan nga huna-hunaon sa makadaghan nga higayon ayha pabakunahan ang ilang mga anak.
Kahinumduman nga nakakuha ug pagtagad ang nahisgutan nga lakang human nga naatol kini sa pagsugod sa roll out sa bakuna alang sa mga nag-edad ug 5-11 anyos.
Una ng nasayran nga iya matud pa ang maong billboard sa Alliance of Filipinos For Freedom and Informed Choice (AFFIC), nga nakita sa milabay nga weekend ayha kini gipatangtang.
Una ng gibutyag ni City Covid-19 Task Force Spokesperson Dr. Michelle Schlosser nga nahisgutan na ang maong concern atol sa gipahigayon nga task force meeting ug nakiglambigit na sila sa City Legal Office (CLO) alang sa legal opinion.
Gani gimandoan sab karon ang city security cluster nga pahugtan pa ang ilan g monitoring aron nga madetermina ang mga tawo nga mipaluyo sa maong campaign drives.
Gawas sa pagpahimutang ug Billboards, una na matud pa nga nanghatag ang mga volunteers niini ug leaflets nga nag-awhag sa publiko nga dili dali-on ug maghulat kung epektibo pa ang bakuna alang sa panglawas sa mga bata.
Una ng gibutyag ni Schlosser nga ang susama nga mga lakang mamahimong makaapekto sa nagpadayon nga vaccination sa gobyerno ilabi na sa booster shots.
Tungod niini, pahugtan pa karon sa siyudad ang information campaign isip tubag sa pagpaningkamut sa pipila ka mga grupo arun pugngan ang nagpadayon nga Covid-19 vaccination drive.
Magpadayon matud pa ang kagamhanan sa pagpasabot kung nganong kinahanglan nga magpabakuna batok Covid-19.
