DAVAO CITY – Gimugna pagbalik sa City Government of Davao ang Local Council for the Protection of Children ug ang LCPC Inter-Agency Monitoring Task Force sa dakbayan nga nag-ila sa mga katungod sa kabatan-unan taliwala sa gigikanan, gender preference ug estado sa kinabuhi, og maghimo ug mga programa aron lugwayan ang ilang katungod isip kabahin sa katilingban diri sa Davao City.
Gipirmahan ni Davao City Mayor Baste Duterte niadtong Disyembre 6 ang Executive Order no. 73 ang maong pagpaila sa Children’s Welfare Code, Series of 1994, nga nag-amyenda sa karaang Davao City Council for the Welfare of Children kon LCPC isip usa ka organisasyon nga nagmuntar sa mga programa alang sa mga kabatan-onan gikan 0 ngadto 18 anyos ang pangidaron.
Laraw sa bag-ong ordinansa ang pagpanguna sa mga programa aron mabatunan ang child-friendly environment diri sa dakbayan.
Nahimo sab sumbanan niini ang Memorandum Circular No. 2002-121 sa DILG nga naghatag ug guidelines sa pagpakusog sa mga child welfare organizations sa matag panggamhanan nga panukaran sa matag barangay. Pagatutukan sa maong ordinansa ang mga programa ug pasilidad sa edukasyon, panglawas, ug development sa mga kabataan.
Suportahan sab sa maong ordinansa ang mga pagbansay sa mga learning materials sa mga bata gikan sa digital ug print media, paghatag ug tabang legal sa mga batang biktima sa pagpangabuso, ug uban pang suportang gikinahanglan alang sa mga kabatan-onan.
Pangunahan kini sa city mayor kon usa sa mga representante isip chairperson, Sangguniang Panlungsod Committee Women, Children and Family Relations chairperson, ug uban pang hingtungang ahensya ug NGO sa dakbayan.
via || Bombo LJ Florendo
