Mikunhod og kapin sa 50% ang insidente sa sunog sa dakbayan sa Davao sa unang tunga nga bahin karong tuiga.
Sa gipaguwang datos sa Bureau of Fire Protection (BFP) Region XI, electrical connection gihapon ang nag-unang hinungdan sa sunog.
Samtang nakatala usab ang nasampit nga ahensya gikan Enero hangtod Hunyo 15, nga adunay 52.63% nga pagminus kung itandi sa susamang panahon niadtong 2024.
Sumala sa report sa Bureau of Fire Protection (BFP) Region XI, nakatala sila og 531 ka fire incidents karong tuiga, nga layo lamang sa 1,099 ka mga kaso nga narehistro sa unang katunga nga bahin sa 2024.
Gipamatud-an ni Senior Fire Officer 2 Sheena Suralta, ang acting spokesperson sa BFP XI, ang maong positibong trend atol sa gipahigayon nga press briefing.
Sumala pa sa nahisguatang opisyal nga nag-una gihapon nga hinungdan sa sunog ang mga electrical connections nga adunay 32 ka kaso, 7 ka kaso tungod sa open flames (torch o gasera), ug 5 ka kaso tungod sa pagpasagad sa pagluto.
Kung itandi sa unang katunga nga bahin sa 2024, 66 ka kaso ang nalambigit sa electrical connections, 29 sa open flames, ug 12 ka kaso sa welding o slagshot sparks.
Samtang gipasidunggan ni Suralta ang positibong resulta sa padayon nga implementasyon sa mga programa sa BFP sama sa “Oplan Ligtas na Pamayanan”, nga nagtumong sa paghatag og kahibalo sa mga komunidad ilabina sa mga purok-level kabahin sa ilahang papel ug responsibilidad sa pagpugong ug paglikay sa sunog.
Lakip sa programa ang regular nga fire drills nga ginabuhat matag bulan o matag quarter nga dili lamang sa mga eskwelahan ug negosyong establisemento, kondili labing importante sa barangay level.
