Hugot karung ginapatuman sa Lingap Para sa Mahirap ang no helmet, drunk driver; no lingap policy o ang dili paghatag og ayuda alang sa mga ma-aksidente gumikan sa kahubog o paglawig sa mga kadalanan nga walay suot nga helmet.
Sumala pa ni Gerardine Jean Reyes, leader sa receiving team sa Lingap Para sa Mahirap nga kini subay sa Executive Order sa lokal nga panggamhanan, sukad pa kaniadtong 2018.
Gani, ilawom sa maong kamandoan, dili mamahimong makapahimulos sa Lingap ang mga pasyente, nga naaksidente sa motorsiklo nga wala nigamit og helmet, walay suga ang ilang unit, daot ang brake pads ug uban pang mga paglapas sa balaod trapiko ilabi na karung holiday season.
Dili usab makadawat og Lingap ang mga maaksidente tungod lango sa ilimnong makahubog o lango sa iligal nga droga ang maong driver subay na usab sa Anti Drugged and Drunk Driving Act dinhi sa dakbayan.
Samtang, gipasabot sa opisyal, nga ang Lingap para sa Mahirap, usa ka programa sa lokal nga panggamhanan, busa ang makapahimulos niini ang mga residente lamang sa Davao City.
Hinuon gipasalig niini nga ang mga nagkinahanglan og mga ayuda, nga gikan sa gawas sa dakbayan ang otomatikong gina-refer sa uban pang mga ahensiya arun nga matabangan.
