DAVAO CITY – Lima ka mga Bayanihan Schools ang ipatukod sulod karong bulana sa hilit nga mga barangay sa Compostela Valley Province.
Ang nahisgutang mga tulunghaan ang alang sa mga kabataang magtutungha nga naka-undang sa pag-eskwela human gipa-serhan sa Department of Education ang mga tulunghaan sa Salugpungan Ta’ Tanu Igkanogon Learning Center sa nahisgutang dapit.
Sa kasamtangan, usa ka tent ang gipahimutang isip temporaryong classroom alang sa dul-an 70 ka mga estudyante sa Sitio Sapang-Lubog sa Barangay Tibagon, Pantukan Compostela Valley Province.
Ang nahisgutang tulunghaan ang usa lamang sa lima ka mga Bayanihan Schools nga tukuron sa nahisgutang probinsya sulod karong bulana.
Mipahimutang na usab ug duha ka mga magtutudlo ang Department of Education (DepEd) sa maong tulunghaan gawas pa sa dugang duha ka mga magtutudlo nga gihatag sa lokal nga kagamhanan sa ComVal ilalom sa Local School Board.
Gawas sa libre nga pagtungha, hatagan usab ang mga estudyante ug libre nga paniudto isip kabahin sa proyekto sa probinsya nga “Kusina ng Kalingap”.
