DAVAO CITY – Gihatod na sa ulahing kapahulayan ang 57 anyos nga kanhi empleyado sa gobyerno nga giilang si Lilian Nieva.
Pribado ug limitado lamang ang mga nakigduyog sa lubong sa nahisgutan nga kahinumdumann nga gidunggab sa iyaha mismong panimalay sa Deca Homes Talomo, Bago Gallera ning dakbayan ning milabayng simana.
Wala sab makapagawas pa og pahayag ang pamilya sa biktima gumikan sa ilang hangyo. Nagpaabot ug pasaylo ang Davao City Police Office gumikan kay dili pa makahatag og daghanang detalye mahitungod sa kamatayon sa biktima.
Hinuon, gisiguro sab sa mga sakop sa gimugnang City Level Task Force Oplan Siyasat nga samtang gipaabot pa ang pagmugna og SITG kon Special Investigation Task Group, ilaha nang makuptan ug mapagawas ang komprehensibong resulta sa imbestigasyon sa dali nga panahon.
Kahinumduman nga nakita sa iyang igsoon si Nieva nga nagbuy-od og wala nay kinabuhi sulod sa iyang kwarto kansa nakahiagom og 44 ka mga samad dinunggaban. Nasayran usab sa imbestigasyon nga nawani ang cellphone ug pipila ka mga alahas nga gipanag-iyahan sa biktima.
Dugang ni P/Capt. Hazel Tuazon, tigpamaba sa Davao City Police Office, nga Setyembre 27 ning tuiga ulahing nakita ang biktima sa iyang mga silingan ug nadunggan usab nga adunay nangayo’g tabang, kaniadtong Setyembre 28, apan wala kini panumbalingi.
Giklaro usab ni Tuazon nga wala nahitabo kagahapon ang pagpagawas sa resulta sa imbestigasyon apan mao kadto ang labing unang adlaw sa panagpulong sa mga sakop sa gimugnang special team.
