DAVAO CITY – Pagasugdan na ang libreng transportasyon sa Business for Environmentally Sustainable Transformation (BEST) Bus sa dalan sa dakbayan sugod karong adlawa.
Kini proyekto nga inisyatibo sa Aboitiz Power Company ug Global Electric Transport (GET) Philippines.
Kahinumduman nga mipirma na og kasabutan sila Davao City Mayor Inday Sara Duterte-Carpio tali sa Davao Light and Power Company kaniadtong Biyernes diin ang malahutayong programa gitawag nga Business for Environmentally Sustainable Transformation (BEST) Bus.
Sumala sa pamahayag sa mayor, adunay pito ka BEST bus nga 100 percent electric ug fully-airconditioned ang mutuyok sa syudad sugod karong adlawa nga adunay 30 person seating capacity apan gumikan sa padayon nga hulga sa COVID-19, 15 lamang ang mamahimo nga makasakay niini.
Dugang sa mayor nga libre lamang ang pagsakay sa maong bus apan kinahanglan nga magrehistro sa BEST Pass QR Code ug ipa-scan kini atol sa pagsakay.
Kinahanglan nga mag download usa og app ngadto sa Google Play, i-download lamang ang BEST Bus ug BEST Bus stops nga pwede sa android phone ug iphone users.
Ang nahisgutan nga 7 ka BEST bus mutuyok sa kadalanan sa dakbayan partikular na sa Downtown Ikot 1, mulatas kini gikan C. Bangoy St., Rizal St., Bolton St., Magallanes St., C.M. Recto, Acacia, Bajada, SM Lanang, Azuela Cove, R. Castillo, Carpenter, Sta. Ana Ave., ug balik sa C. Bangoy St.
Samtang sa Down Town Ikot 2, maglatas kini gikan C. Bangoy St., padulong Palma Gil St., Camus, Quirino, Bankerohan, Sandawa, Quimpo Blvd., Ecoland Drive, Times Beach, Ecowest, Quimpo, Sandawa, Bankerohan, Magallanes, Boulevard, R. Magsaysay ug balik na usab sa C. Bangoy.
Gipasalamatan sa Mayor ang Davao Light ug GET Philippines sa paghatag og libre ug luwas nga transportasyon alang sa mga Dabawenyos hilabi na karon nga dako kaayo kini og tabang gumikan sa padayon nga hulga sa COVID-19.
