DAVAO CITY – Palawman pa karon sa mga sakop sa kapulisan sa Digos ang ilang gihimong pagpanubay arun nga daling masayran kung si kinsa ang mipaluyo sa pagpusil patay sa usa ka Barangay Kapitan sa San Jose sakop sa nahisgutan nga lugar nga nailang si Angelito Zamora Balasbas, 50-anyos.
Sa inisyal nga imbestigasyon sa otoridad, sakay lamang iyang SUV ang biktima ug pag-abot niini sa Purok Jakosalem Barangay San Jose, Digos City kalit nga mibutho ang mga suspek nga sakay sa motorsiklo partikular na sa may drivers seat ug gibanhigan ang biktima sulod sa pipila ka higayon.
Human nag gihimong krimen, paspas sab nga misibat ang mga suspek sa wala matino nga direksiyon.
Gisulayan pa pagdala ang biktima sa balay tambalanan apan gideklara kining dead on arrival sa mga doktor.
Wala pay matumbok nga motibo ang kapulisan sa pagpatay sa biktima ug subayon pa karun kung aduna kini nakabangi o kung adunay kalabutan sa politika ang nahisgutan nga krimen.
Sa kasamtangan mitanyag na sab ang lokal nga kagamhanan sa Digos ug usa ka milyon ka pesos sa bisan kinsa man nga nakaila ug makatudlo sa gikabutngan sa suspetsado.
