DAVAO CITY – Na-sampolan sa nagpadayon nga internal cleansing sa kapolisan ang duha ka mga sakop sa kapolisan sa Davao City Police Office (DCPO).
Subling nagpahimangno si DCPO Director Senior Supt. Michael John Dubria nga pagkataktak sa serbisyo gayud ang mamahimong dangatan sa mga mohimo ug kabu-ang sa ilang pagpangatungdanan.
Sumala pa kang DCPO Spokesperson PSI Catherine Dela Rey nga mamahimong leksyon ngadto sa kapolisan sa DCPO ang gidangatan sa duha ka mga police nga nag-atubang karon ug kasong administratribo ug kasong criminal nga sila si PO2 Allan Escuadra, ug PO2 Junrez Atugan nga mga sakop sa Talomo PNP.
Si Escuadra ang police nga mitago sa kwarta sa peneriso nga mikantidad ngadto sa sais mil ka pesos, nga gisulod niya sa iyang sapatos, ug locker.
Samtang si Atugan ang misita sa managtrato nga nanaghalok sa Hilltop ug mi-bastos sa babaye ug gipangayo-an ug kwarta ang duha ka mga biktima nga managtrato.
Sumala pa kang Dela Rey nga kung gimahal sa kapolisan ang ilang pamilya ug trabaho dili unta sila magpasagad sa ilang trabaho aron nga dili sila mataktak sa serbisyo.
