Human sa kapin usa ka semana nga pagpangita, nakapahupay na sa pamilya Resquites ang pagkarekober sa lawas sa 13-anyos nga si Akisha Van Dalanon Resquites, nga nawala atol sa pagbaha sa Mini Asik-Asik Falls, Brgy. Carmen, niadtong Setyembre 14.
Nakit-an ang lawas sa daplin sa sapa sa Campo 5, Brgy. Riverside, Calinan District, Setyembre 20, pinaagi sa tabang sa mga residente nga nakamatikod sa irog nagkalot sa daplin sa tubig.
Gilayon nga gipasabot kini sa mga otoridad ug nagresulta sa pagkarekober sa bata.
Matod sa pamilya, bisan tuod masakiton ang kamatuoran, nakahatag kini og kahupayan nga makita ug makuha ang lawas sa ilang anak.
Gipasalamatan sa kabanay ang BDRRMC, SEMSRA, Calinan Police Station ug ang mga residente sa ilang tabang ug pagtinabangay sa tibuok search and retrieval operation.
Samtang, nagpahinumdom ang mga otoridad sa publiko sa pag-amping sa panahon sa kalit nga pagbaha, ilabi na sa mga lugar nga duol sa suba ug busay.
