DAVAO CITY – Mihimo na karon ug lakang ang lalawigan sa Davao del Norte aron nga masolusyonan ang suliran sa mga banana plantation nga grabeng naapektohan sa Panama disease.
Kahinumduman nga daghanang mga mag-uuma ang posibleng makulban ug kaldero gumikan kay anaa na sa 300 ektarya nga banana plantations ang apektado sa Fusarium wilt.
Una ng nakadesisyon ang banana packing houses sa Sto. Tomas, Davao del Norte nga manirado na lamang tungod sa maong suliran gumikan sa kadako sa lugi.
Gitumbok ni Sto. Tomas Councilor Dario Romano ang mga packing houses Barangay Kimamon, Talomo, ug Lungaog ingon man ang banana plantations sa Barangay Luna nga susamang naapektohan sa Panama disease.
Miubos na sumala pa karon ang mga nindot nga klase sa saging nga maoy hinungdan nga nakasinate na ug pagkalugi ang mga banana growers sanglit wala na silay pundo aron masustentohan ang ilang operasyon ug maprotektahan ang ilang plantasyon.
Gitataw sab ni Romano nga giduso nila karon ang pagmugna ug soil ug plant laboratory ingon man deployment sa soil ug banana technicians isip nag-una nga solusyon sa nagkadako nga suliran sa mga plantasyon sa saging.
