DAVAO CITY – Nasikop sa otoridad ang usa ka lalaki nga nangawat sumala pa ug cellphone sa pipila ka mga atleta atol sa Palarong Pambansa 2019 sulod sa ilang billeting quarters sa Calinan Central Elementary School kagahapong adlawa.
Base sa report gikan sa kapulisan, naila ang suspek nga si Ariel Robles Detomas, 24, residente sa Purok 23 Bagobo Village, Acacia Calinan.
Gikanayong pipila ka mga boxing student athletes gikan Cagayan de Oro City ang nagpatala nga nawala ang ilang mga cellphones samtang sila nangatulog.
Sumala pa kang Police Major Archimedes Wesley, Calinan Police Station commander, gipamuslan sa suspek ang kalit nga pagbundak sa ulan diin nangatulog ang mga estudyante ug misulod kini agi sa likod nga bahin sa tulonghaan.
Dali nga nakiglambigit ang mga atleta sa naka-duty nga pulis hinungdan nga naglusad ug follow up operation ang kapulisan sa tabang sa impormasyon nga gihatan sa mga residente duol sa lugar.
Sumala ni Detomas dili lamang siya ang naghimo sa krimen ug naa pa siyay duruha ka mga kaubanan nga nagpabiling gawasnon karong panahona.
Narekober sa posisyon sa dinakpan ang tulo ka mga cellphone ug kutsilyo samtang ang laing duruha ka mga cellphones ang anaa sumala pa sa mga kaubanan niini.
Gipasakahan gilayon ug kasong robbery ug kalapasan sa Omnibus Election Code of the Philippines (Batas Pambansa Bilang 881) ang suspek kagahapon.
Nasayran sa otoridad nga una na sab nga nasikop si Detomas gumikan pa gihapon sa pagpanulis.
Padayon ang gipahigayon nga pursuit operation sa otoridad batok sa mga nakaikyas nga kaubanan sa dinakpan.
