DAVAO CITY – Gikumpirma sa usa ka Isidro Plaza Palma nga nakulong ug halos usa ka tuig ang iyang apo nga nailang si Ricel Ubas Palma apan nakagawas sumala pa kini sa presohan human nakapiyansa ug hangtud nga gi-dismiss ang gi-atubang niini nga kaso.
Kahinumduman nga nakabsan sa iyang kinabuhi si Ricel human nga gipusil kini sa wala mailhing suspetsado.
Ayha nahitabo ang insidente, nakighinabi pa ang biktima sa iyang kaubanan sa trabaho nga sila so Carmelita Tiamson Albite, babaye, 54 anyos, minyo ug residente sa Espino Compound dumoy ning dakbayan; Merlyn Jumapao, 42 anyos, minyo residente sa Purok Sasao, Dumoy ning dakbayan ug Gil Roxas Bacalla, 55 anyos, minyo ug residente sa #103 Daliao St. Toril ning dakbayan.
Sumala sa mga nahisgutan samtang nanglimpiyo sila daplin sa dalan sa IWHA, Dumoy ning siyudad isip kabahin sa Tupad project sa DOLE 11, kalit nga mibutho ang duruha ka mga suspek nga sakay sa motorsiklo diin ang angkas niini mibunlot sa wala matino nga klase sa armas ug diretso nga gipusil ang biktima.
Nakahimo pa pagdagan ang biktima apan naabtan pa gihapon kini sa mga mamumuno ug subli nga gipusil nga maoy hinungdan nga nahagbong kini sa drainage.
Samtang natapsingan sab ang kaubanan sa biktima nga nailang si Rebil Banzales atol sa maong insidente.
Gipalawman pa karon sa kapulisan ang ilang imbestigasyon aron nga masubay kung si kinsa ang mga suspek ug kung unsa ang motibo sa krimen.
