DAVAO CITY – Girekomenda na sa Office of the City Prosecutor nga pasakahan ug kaso ang isa ka lalaki nga nagdala-dala ug armas nga adunay mga buhi nga bala sulod sa Francisco Bangoy International Airport.
Adunay nakitang lig-on nga basehan si Prosecutor Maria Cynthia Adao-Prat aron pasakahan ang suspek nga si Oscar L. Presto Sr. ug kalapasan sa Republic Act 10591(Comprehensive Firearms and Ammunition Law).
Subay sa affidavit ni SPO1 Palmero Reyes, nababagan si Presto sa screening officer sa Aviation Security 11 ug sa x-ray machine sa airport.
Gikanayong adunay nakita nga caliber .32 revolver nga adunay lima ka mga buhing bala sulod sa bagahe niini. Unod sab sa resolusyon ni Prat nga aprubado ni Shahruddin Roberto Sencio, adunay lig-on nga sumbanan nga pasakahan si Presto gumikan kay dili lisensiyado ang gihuptan niini nga armas ug wala kini record sa Philippine National Police, Civil Security Group, Firearms and Explosive Office sa Camp Crame sa Quezon City.
