DAVAO CITY – Padayon karon ang Police Regional Office 11 sa pagsikop sa mga suspek nga nakalapas sa RA 10591 o “Comprehensive Law on Firearms and Ammunitions Regulation Act”.
Una ng nakadawat ang Digos City Police Station ug text message gikan sa usa ka concerned citizen nga adunay usa ka lalaki nga gikanayong nagpaboto ug armas sa Manucay resident, Jacinto Zamora Street, Barangay Zone III, Digos City.
Dali nga miresponde ang kapulisan sa lugar ug malampuson nga nasikop ang suspek nga nailang si Abdiel Al Aali Mualam, 28 anyos, lalaki, ulitawo, security guard ug residente sa Manucay Boarding House nga nahimutang sa kanto Jacinto ug Zamora Street, Brgy. Zone III, Digos City.
Gikanayong nagpaboto sa ilang ARMSCOR 202 Caliber .38 revolver ang suspek sulod sa gi-arkilahan nga lawak ni Angelica Gonzales ug mideretso kini sa bungbong.
Sa inisyal nga imbestigasyon, naghurumentado ang suspek sa maong boarding house dayon nagpaboto sa ilang armas gumikan sa iyang grabe nga kahubog.
Narekober sa mga police officers gikan sa suspek ang usa ka unit sa ARMSCOR 202 Caliber .38 revolver nga adunay tulo ka mga buhing bala ug usa ka fired cartridge.
Gikustodiya karon ang mga ebidensiya sa Digos CPS alang sa tukma nga disposisyon samtang ang nasikop nga suspek ang gipasakahan ug kalapasan sa RA 10591 ug Alarm and Scandal.
