DAVAO CITY – Pasakahan na ug kasong murder ang usa ka lalaki nga gitudlong maoy mipatay sa iyang hinigugma sa Kilometro 8, Matina Pangi ning dakbayan.
Sumala pa kang Police Maj. Ronald Lao, hepe sa Talomo Police Station ang suspek nga si Oliver Edano, alyas Puloy, lumad nga taga Malabog Paquibato District.
Kahinumduman nga nakita na lamang nga nagbitay ug walay kinabuhi ang biktima nga si Lilibeth Sabat Romagos, 42-anyos sulod sa panimalay niini sa nahisgutan nga dapit.
Gidudahan ang gikanayong pagpakamatay sa biktima gumikan kay ulahi sumala pa kini nga nakita nga kauban ang suspek ug nagdala og pack bag ug mga gamit.
Tungod niini, nagtuo si Lao nga adunay foul play sa kamatayon sa biktima. Usa sa gitutukan nga motibo sa krimen mao ang naghinobra nga selos.
