DAVAO CITY- Patay ang usa ka lalaki nga adunay Warrent of Arrest sa kasong murder human nga misukol kini sa kapulisan sa dihang arestohon na unta ala 1:30 ang takna sa kahaponon karong adlawa lamang sa Km. 10 Sasa ning dakbayan sa Davao.
Ang suspek ang giila sa pangalan nga si Alkhalid Jamdani, hamtong ang pangidaron ug residente sa Purok 2, Km. 11, Muslim Village ning dakbayan.
Subay sa imbestigasyon, misukol matud pa ang suspek sa dihang arestohon na kini ug gipusil ang arresting officer gamit ang iyang .38 nga revolver.
Apan dali nga nakabalos sa pagpabuto ang pulis ug naigo ang suspek rason sa hinanaling kamatayon niini. Nasayran nga ang suspek ang ika-upat sa Most Wanted Person ug ikaduha sa drugs watchlist sa Sasa Police Station.
Sa pikas bahin, giila sab ang suspek isip miyembro sa SABANI Criminal Group nga nalambigit sa pagpayuhot og iligal nga druga ug gun running dinhi sa dakbayan ug sa kasikbit nga probinsya sa rehiyon sa Davao.
Narekober gikan sa posisyon sa suspek ang usa ka unit sa .38 kalibre nga revolver nga adunay duha ka buhing bala, usa ka basiyo sa bala sa .38 kalibre nga revolver ug pito ka nagkadaiyang gindak-on sa pakete sa gikatuohang shabu.
Ang narekober nga mga shabu ang gibana-banaang mitimbang og 5 gramos nga adunay street value nga gibana-banaang mukabat sa P30,000.
Patay’ng lawas sa suspek ang gipahimutang na sa usa ka lokal nga punerarya ning dakbayan.
