DAVAO CITY – Patay ang usa ka lalaki dihang gikulata sa iyang magulang atol sa ilang panagbikil sa Purok 5, Pag-asa, Brgy. Guadalupe, Carmen, Davao Del Norte, sa milabayng adlaw.
Giila ang biktimang si Florencio Molinos Seraje alyas “Moroy”, 66 anyos, residente sa susamang dapit. Samtang ang suspek giila isip Alberto Molinos Seraje, alyas “Bitong”, 70 anyos, residente sa nahisgutang dapit.
Sigon sa imbestigasyon sa Carmen Municipal Police Station, nakig-inum ang biktima sa iyang higala, dihang nahitabo ang kumusyon tali sa iyang igsuon.
Sa tunga-tunga sa ilang panaglalis, gisumbag ni alyas “Bitong” ang iyang igsuon nga si alyas “Moroy”.
Gisipa-sipaan pa sa makagdaghag higayon sa suspek ang iyang igsuong biktima dihang natumba sa yuta, nga nagresulta sa iyang hinaling kamatayon.
Gidali-dali pa og tabang ang biktima sa Carmen District Hospital apan gideklara na siyang dead on arrival tungod sa nahiagum niining traumatic brain injury. Boluntaryong nitahan ang suspek sa mga otoridad human sa insidente.
Gipasaka na ang kasong Homicide batok sa suspek nga kasamtangang himas rehas na karon sa Carmen Municipal Police Station.
via || Bombo LJF
