DAVAO CITY – Arestado ang usa ka lalaki sa mga sakop sa Sasa Police Station human kini nanion og pusil sa usa ka menor de edad sa Purok 26 Regner, Malagamot, Panacan, Davao City.
Sumala sa Commander sa Sasa PNP nga si Police Major Jake Goles, nailhan nila ang suspek nga si alyas “Eleazar”, 45 anyos, residente sa maong lugar.
Nadawat sa kapulisan ang maong reklamo gikan sa tawag sa biktima nga wala una gihinganlan.
Base sa imbestigasyon sa maong buhatan, naglakaw lang ang biktima paingon sa iyang pag-umangkon sa may Kalahi Village, Malagamot, Panacan sa dihang kalit miduol ang suspek ug sa walay pagduha-duha, mikuha kini sa iyang pusil gikan sa sling bag ug gition kini sa liog sa biktima.
Nakuha gikan kang alyas “Eleazar” ang usa ka caliber 9mm nga pistola ug usa ka magazine nga adunay unom ka buhing bala.
Balhug na karon sa Sasa Police Station ang maong suspek nga pasakahan og kasong pagsupak sa Republic Act 10591 o Comprehensive Firearms and Ammunition Regulation Act.
Via || LJ Florendo
