Gisilutan sa korte ang usa ka lalaki human nga nangisturbo sa iyang mga silingan pinaagi sa kanunay nga pagsulod sa ilang mga balay aron lamang simhoton ang ilang mga sapatos.
Ang 28-anyos nga Griyego misaysay sa korte sa Thessaloniki nga dili niya maesplikar ang iyang pamatasan, nga nakahatag kaniya og dakong kaulaw.
Gipasiugda niya nga wala siya magtinguha nga makasupak sa balaod o makahatag og kadaut sa bisan kinsa, ug ang mga silingan misaksi sab nga wala siya nagpakita og bisan unsang timailhan nga agresyon sa iyang matag gabie nga pagbisita.
Sumala pa sa report, ang lalake nakit-an sa aktong gisimhot ang mga sapatos sa iyang mga silingan diin gibilin sa gawas aron mahanginan.
Ang lalaki nadakpan sa wala pa ang buntag ngadto sa gamay nga lungsod sa Sindos, 15 ka kilometros sa kasadpan nga bahin sa Thessaloniki.
Nahibal-an sab sa korte nga adunay tulo ka susamang insidente sa milabayng unom ka bulan, bisan pa man nga nihangyo na ang mga silingan sa pamilya sa maong lalake nga undangon na kini, apan naga padayon gihapon kini.
Sa pagkakaron, gitanggal ang usa ka buwan nga silot, apan ang lalaki kinahanglan nga musalmot og therapy sessions aron nga saktong matambalan.
