DAVAO CITY – Nasinatian sab sa Davao del Norte ang nahitabong linog sa ilang kasikbit nga probinsya sa Davao de Oro kagahapon.
Natumpag ang kisame sa usa ka mall sa Tagum City samtang dali-dali sab nga gipanghikling ang katawhan paggawas sa maong mall.
Samtang, natala sab sa Provincial Disaster Risk Reduction and Management Office sa Davao del Norte nga dunay usa ka 19 anyos nga babaye ang naangol human nahulugan sa kongkretong fire wall.
Kasamtangang anaa sa luwas na ang kahimtang niini human nga dali kining gidala sa balay tambalanan.
Nagdeklara na og suspension sa trabaho ug klase ang probinsya gikan kagahapon human natala ang Intensity IV sa probinsya atol sa nahitabong linog.
Gipakatag na sab sa Disaster Risk Reduction & Management Council sa probinsya ang ilang Rapid Damage Assessment and Needs Analysis Team aron maglusad og building integrity assessment alang sa pagseguro sa kaluwasan sa mga trabante og estudyante sa ilang tagsa-tagsa ka gambalay.
Suspendido sab ang trabaho apan magpahigayon gihapon og klase sa tanang lebel nga ipahigayon pinaagi sa blended learning sa Tagum City, subay kana sa memorandum nga gipagawas sa ilang city government.
Hinoon, walay nakabsan sa kinabuhi sa probinsya sa Davao del Norte atol sa maong makusog nga linog.
via || Bombo LJF
