DAVAO CITY – Nagdonar og duha ka internet satellites ang kumpanya sa bilyonarong si Elon Musk ngadto sa House of Hope Foundation sa Southern Philippines Medical Center.
Personal nga gihatag sa usa ka myembro sa Polaris ang duha ka mga Starlink kits nga gilaumang maghatod ug paspas nga internet connection nga magamit alang sa paglugway sa proseso sa kahimsog ug kaluwasan sa mga pasyente.
Usa ang SPMC sa lima ka mga benepsiyaryo sa tibuok kalibutan nga nakadawat og Starlink kits gikan sa programang Polaris, nga usa ka spaceflight program sa Space X nga gikan pa sa Estados Unidos.
Gawas sa SPMC sa Pilipinas, nakadawat sab sa susamang ekipo ang mga benepisyaryo gikan Brazil, Chile, Mozambique, ug Peru.
Naka-install na sa House of Hope ug SPMC compound ang duha ka mga satellite dishes. Gilaumang mapaayo pa sa maong internet provider ang paghatag og serbisyo sa ospital.
Giila ang Starlink nga una ug kinadak-ang satellite constellation sa kalibotan nga naggamit ug ubos nga Earth orbit para maghatud ug broadband internet nga dunay gikusgon hangtud 500 mbps.
via || Bombo LJF
