DAVAO CITY – Nagpadayon ang gipahigayon nga konsultasyon sa Department of Health (DoH) ngadto sa evacuation centers sa mga lugar nga apektado sa linog.
Kahinumduman nga kaniadtong milabay nga semana, nakatala na ug kinatibuk-ang 1,034 consultations sa 19 ka mga evacuation centers sa Davao Region, samtang kinatibuk-ang 7,068 consultations ang gipahigayon sa 49 evacuation centers sa probinsiya sa Cotabato.
Nasayran nga ang pipila ka mga balatian nga gimonitor sa mga evacuation areas ang gilangkuban sa acute respiratory infection nga adunay 394 ka kaso o adunay kinatibuk-ang 38.1%.
Gisundan kini sa kalintura nga adunay 245 o 23.7%; hypertension ug acute watery diarrhea nga adunay tig-103 o kinatibuk-ang 9.9%.
Sa pikas nga bahin, 4,157 ka mga biktima sa Cotabato ang nakaangkon ug upper respiratory tract infection uban ang 58.8% sa kinatibuk-ang konsultasyon.
Gisundan kini sa hypertension uban ang 1,580 ka kaso o 22.4% ; pagpanakit sa ulo nga adunay 628 o 8.9%; systematic viral infection nga adunay 215 o 3%; ug acute gastroenteritis nga adunay 193 o 2.7%.
Hinuon gibutyag ni Assistant Secretary Abdullah B. Dumama Jr. nga wala silay natalang kaso sa dengue sa evacuation areas.
Una niini, nagpahigayon ang National Nutritional Council (NNC) ug assessment sa nutritional status sa IDP’s sulod sa evacuation areas. Samtang ang Health ug water sanitation education ang gihatag sa 1,225 ka mga indibidwal.
