DAVAO CITY – Gikanayon sa Davao City Public Safety and Security Command Center (PSSCC) nga kinatibuk-ang 9,641 ka mga security personnel, law enforcement ug uban pang force multipliers ang ilang ipakatag alang sa tinuig nga paghinumdom sa All Saints’ ug All Souls’ Days sa Nobyembre 1 ug 2.
Sumala pa kang PSSCC head Angel Sumagaysay nga andam na ang Oplan Kaluluwa security plan ilabi na nga laoman sumala pa ang pagdagsa sa mga tawo sa mga nag-unang sementeryo sa siyudad.
Gipahimangnoan sab ang publiko nga matag panahon sa Undas adunay mga items nga ginadili dad-on sulod sa sementeryo sama sa bladed weapon, ilimnong makahubog, baraha, mahjong o gambling items ingon man kusog nga mga speakers/stereo.
Gimonitor na sab nila karon ang kinatibuk-ang 35 ka mga sementeryo lakip na ang 16 ka mga large cemeteries.
Aduna sumala pa silay average deployment nga 1,928 alang sa upat ka adlaw nga pagpatuman ug seguridad.
